पेसा क्षेत्रातील मानधन कर्मचाऱ्यांच्या भरतीसंदर्भात सकारात्मक चर्चा.

नवनीती न्यूज 

मुंबई : पेसा तेरा जिल्ह्यातील 17 संवर्गातील मानधन कर्मचाऱ्यांना नियमित सेवेत सामावून घेण्याच्या मागणीसंदर्भात दिनांक 07 जुलै 2025 रोजी चारोटी नाका, पालघर येथून मंत्रालयाकडे नियोजित असलेल्या पायी बिऱ्हाड मोर्च्याच्या पार्श्वभूमीवर, आज  मंत्रालयात आदिवासी विकास मंत्री  अशोक उईके यांच्या अध्यक्षतेखाली व आमदार राजेंद्र गावित यांच्या उपस्थितीत संघटनेच्या प्रतिनिधींशी सविस्तर चर्चा पार पडली.यावेळी मंत्री डॉ.उईके यांनी पेसा क्षेत्रातील मानधन कर्मचाऱ्यांच्या भरतीसंदर्भात सकारात्मक चर्चा झाली असल्याचे सांगून शासनाकडून 45 दिवसात ठोस निर्णय घेण्यासाठी प्रयत्न केले जातील अशी ग्वाही दिली.

शासनाकडून 45 दिवसात ठोस प्रयत्नांची ग्वाही : मंत्री डॉ. अशोक उईके

‘आदिवासी तेरा संवर्ग पेसा कर्मचारी संघटना, महाराष्ट्र राज्य’ यांच्या वतीने आदिवासी विकास मंत्री यांना निवेदन देण्यात आले. यावेळी संघटनेच्या मागण्यांवर गांभीर्याने विचार करत मंत्री डॉ.उईके यांनी स्पष्ट केले की, पेसा क्षेत्रातील भरती प्रक्रियेच्या संदर्भात जे प्रकरण सध्या मा. सर्वोच्च न्यायालयात प्रलंबित आहे, त्या संदर्भातील कायदेशीर प्रक्रिया पूर्ण करून पुढील कार्यवाही करण्यात येईल.

शासन या विषयाकडे संवेदनशीलतेने पाहत असून, आदिवासी कर्मचाऱ्यांच्या न्याय्य मागण्यांबाबत सकारात्मक भूमिका घेण्यात येत आहे. याच पार्श्वभूमीवर, प्रस्तावित मोर्चा सध्या स्थगित ठेवून शासनाला आवश्यक वेळ व सहकार्य करावे, असे आवाहन मंत्री डॉ. उईके यांनी संघटनेच्या प्रतिनिधींना केली.