बीएड (अपेअरिंग) विद्यार्थ्यांना TAIT परीक्षेची संधी मिळणेसाठी निवेदनातून MSCE पुणे आयुक्तांकडे मागणी
नवनीती न्यूज
पुणे : महाराष्ट्र राज्य परीक्षा परिषदेने नुकतेच शिक्षक अभियोग्यता आणि बुद्धिमत्ता चाचणी (TAIT) परीक्षेचे नोटिफिकेशन प्रसिद्ध केले आहे. यामुळे गेली काही वर्षे शिक्षक भरतीची आतुरतेने वाट पाहणाऱ्या विद्यार्थ्यांमध्ये उत्साहाचे वातावरण निर्माण झाले आहे. विशेष बाब म्हणजे, बऱ्याच कालावधीनंतर राज्यात मोठ्या प्रमाणात शिक्षक भरती प्रक्रिया सुरळीतपणे पार पडणार आहे.
या पार्श्वभूमीवर, B.ed धारक विद्यार्थी आपले लक्ष एका अत्यंत महत्त्वाच्या विषयाकडे वेधत आहेत. राज्यातील अनेक विद्यापीठांच्या बीएड अभ्यासक्रमाच्या परीक्षा नुकत्याच पार पडल्या आहेत, तर काही विद्यापीठांच्या परीक्षा काही दिवसात समाप्त होणार आहेत. या विद्यार्थ्यांचा निकाल लवकरच अपेक्षित आहे.
गेल्या काही वर्षांपासून TAIT परीक्षेची तयारी करणाऱ्या आणि आता 30 वर्षांच्या वयोगटात आलेल्या अनेक विद्यार्थ्यांसाठी ही परीक्षा अत्यंत महत्त्वाची आहे. सध्या अनेक विद्यार्थी बेरोजगार आहेत, आणि ही परीक्षा त्यांच्यासाठी आयुष्यात बदल घडवणारी संधी ठरू शकते. जर बीएडच्या अंतिम वर्षाला असलेल्या विद्यार्थ्यांना काही दिवसांच्या निकालामुळे या परीक्षेस बसण्याची संधी मिळाली नाही, तर त्यांच्यावर मोठा अन्याय होईल. अनेक विद्यार्थ्यांचे भविष्य या शिक्षक भरतीवर अवलंबून आहे आणि केवळ काही दिवसांच्या फरकामुळे त्यांना या संधीपासून वंचित राहणे अत्यंत निराशाजनक असेल.
त्यामुळे B.ed धारकांनी विनंती केली की, बीएडच्या अंतिम वर्षाच्या विद्यार्थ्यांना TAIT परीक्षेस बसण्याची संधी देण्यात यावी. यामुळे राज्यातील हजारो इच्छुक आणि पात्र उमेदवार शिक्षक भरतीच्या प्रक्रियेत सहभागी होऊ शकतील आणि त्यांना न्याय मिळेल.
याकरिता बीएड (अपेअरिंग) विद्यार्थ्यांना TAIT परीक्षेची संधी मिळणेसाठी निवेदनातून आयुक्त, महाराष्ट्र राज्य परीक्षा परिषद, पुणे यांचेकडे मागणी करुण जोर धरत आहेत. निवेदन देतांना सचिन नागरगोजे, कृष्णा धांडे, तुषार तांदळे हे विद्यार्थी उपस्थित होते. या गंभीर विषयावर सहानुभूतीपूर्वक विचार करून सकारात्मक निर्णय घेतील, अशी बीएड (अपेअरिंग) विद्यार्थ्यांची अपेक्षा आहे.
